Alejandro Rodrigues

Culturactiva SCG

Coperactiva Cultural – Culturactiva SCG é moito máis que unha empresa de xestión cultural. Nacida fai once anos, é na actualidade a distribuidora líder en Galicia de teatro cómico e de rúa. Máis dun cuarto de milleiro de actuacións moveu en 2009 e en 2010 xa superou esa cifra, que segue medrando en 2011. Tanto no ámbito galego, coma no estatal ou a nivel mundial ten proxección e presencia esta entidade. A risa como motor vital Iván Prado (Lugo, 1974), xunto con varias persoas do eido da cultura e do teatro é o iniciador desta andaina. Actor e director do Festiclown, entre outros festivais, formouse cos mellores mestres: Carlo Colombaioni, Leo Bassi, Philippe Gaulier, Jango Edwards... El, e Fran Rei, e Isabel Martínez-Risco e Pedro Brandariz, entre outros, compoñen os Sete Magníficos máis Un. Esta é a primeira compañía estable de clown en Galicia. Grazas a distribuir os seus pases, Coperactiva Cultural – Culturactiva SCG comezou co seu labor de oficina de venda teatral á hora de confeccionar programacións culturais para concellos, entidades bancarias, asociacións veciñais, institucións públicas, festivais de teatro... ao tempo que desde os seus inicios se convertiu en lanzadeira de ideas, proxectos, programacións e festivais co humor e a risa como nexo de unión.